Ysgrifennu disgrifiad derbyniol o nwyddau
Disgrifiwch eich nwyddau ar gyfer Gwybodaeth am Symudiad yn y Farchnad Fewnol, datganiadau safonol a datganiadau cryno wrth gyrraedd.
Cynnwys y dudalen:
- Beth y mae'n rhaid i chi ei gynnwys ar gyfer pob datganiad
- Disgrifiadau derbyniol ar gyfer gwahanol fathau o nwyddau
- Enghreifftiau o ddisgrifiadau derbyniol
- Datganiadau cryno wrth gyrraedd: geiriau gwaharddedig a nodau annerbyniol
- Gwybodaeth am Symudiad yn y Farchnad Fewnol
- Datganiadau safonol
Defnyddiwch y canllawiau hyn i'ch helpu i ysgrifennu disgrifiad derbyniol o nwyddau a fydd yn ddilys ar gyfer:
- datganiadau a gyflwynir i'r Gwasanaeth Datganiadau Tollau drwy'r Trader Support Service
- datganiadau cryno wrth gyrraedd a gyflwynir i'r Import Control System 2 drwy'r Trader Support Service
Beth y mae'n rhaid i chi ei gynnwys ar gyfer pob datganiad
Rhaid i chi roi manylion clir a phenodol am eich nwyddau, fel y gall y tollau eu hadnabod. Os na wnewch chi hynny, gall eich datganiad gael ei wrthod.
- Gall eich disgrifiad gynnwys:
- deunydd - beth mae'r nwyddau wedi'u gwneud ohono
- defnydd - at beth mae'r nwyddau'n cael eu defnyddio - os oes mwy nag un defnydd i'r nwyddau, nodwch y defnydd sy'n berthnasol i'ch nwyddau
- pecynnu - ar gyfer nwyddau wedi'u pecynnu, nodwch y math o becynnu
- brand a model ar gyfer nwyddau â brand
Gallwch ddod o hyd i fwy o wybodaeth am ddisgrifiadau nwyddau yn DE 6/8 Description of Goods.
Er enghraifft, os ydych chi'n cludo tyrnsgriwiau, peidiwch ag ysgrifennu ‘tyrnsgriwiau’ yn unig.
Gofynnwch gwestiynau allweddol i chi'ch hun am y cynnyrch. Defnyddiwch yr atebion i ysgrifennu disgrifiad clir o'r nwyddau. Cynhwyswch fanylion fel:
- y math - os ydyn nhw'n dyrnsgriwiau hecs, pen fflat, Torx neu Phillips
- lliw - os yw'r carnau'n lliwiau gwahanol
- os ydyn nhw'n eitemau unigol neu'n becynnau
Felly, gallai disgrifiad derbyniol fod: ‘Set o 3 thyrnsgriw coch pen fflat Bosch’.
Defnyddiwch y dull hwn ar gyfer unrhyw nwyddau rydych chi'n eu symud, beth bynnag fo'u maint neu eu math.
Disgrifiadau derbyniol ar gyfer gwahanol fathau o nwyddau
Mae'r wybodaeth y mae'n rhaid i chi ei chynnwys yn dibynnu ar y math o nwyddau rydych chi'n eu symud.
Os ydych chi'n symud dillad wedi'u pecynnu mewn setiau ac yn ôl maint, cynhwyswch y manylion hyn yn y disgrifiad. Er enghraifft: ‘crysau-T cotwm menywod, maint 14, pecynnau o 3’.
Os ydych chi'n symud nwyddau ecséis, rhaid i chi gynnwys y cyfaint, yr enw brand, a maint y cynhwysydd. Er enghraifft: ‘tybaco rholio â llaw, Amber Leaf, 500g’.
Os ydych chi'n symud cynhyrchion alcohol, rhaid i chi hefyd gynnwys cryfder yr alcohol. Er enghraifft: ‘fodca, Absolut, 1 litr, ABV 37.5’
Os ydych chi'n datgan amryfal nwyddau o dan un cod nwyddau, rhaid i chi gynnwys y gair ‘grouping’. Er enghraifft: ‘addurniadau porslen wedi'u gwneud â llaw, cerfluniau crochenwaith pridd - grouping’.
Dysgwch am grwpio ar gyfer datganiadau safonol (yn agor mewn tab newydd).
Dysgwch am grwpio Gwybodaeth am Symudiad yn y Farchnad Fewnol (yn agor mewn tab newydd).
Enghreifftiau o ddisgrifiadau derbyniol
Dylai disgrifiad nwyddau fod yn ddigon penodol i nodi'n union beth sy'n cael ei gludo. Mae'r enghreifftiau canlynol yn dangos y gwahaniaeth rhwng disgrifiad nwyddau annerbyniol a disgrifiad derbyniol.
| Disgrifiad annerbyniol | Disgrifiad derbyniol |
|---|---|
| Dillad | Crysau cotwm dynion (wedi'u gwau) - maint XL |
| Offer | Oergell-rewgell (cyfun), 249 ltr, Hotpoint, gwyn |
| Meddyginiaethau | Tabledi ibwproffen 200mg, 40 uned |
| Ffrwythau | Bricyll ffres (i'w bwyta gan bobl) mewn cratiau (48 ltr) |
| Alcohol | Fodca (Smirnoff) 1ltr, ABV 37.5 |
| Rhannau Ceir | Breciau Ceir, Gwydr Ffenestr Flaen ar gyfer Ceir |
Datganiadau cryno wrth gyrraedd: geiriau gwaharddedig a nodau annerbyniol
Mae rhai geiriau (geiriau stop) a nodau na allwch eu defnyddio wrth ddisgrifio eich nwyddau ar ddatganiad cryno wrth gyrraedd.
Yn y Trader Support Service, os byddwch yn defnyddio gair stop a/neu nod annerbyniol, byddwch yn gweld neges gwall. Bydd angen i chi roi disgrifiad gwell.
Er mwyn eich helpu i osgoi i ddatganiadau cryno wrth gyrraedd gael eu gwrthod, gwiriwch restr yr UE o eiriau stop a nodau annerbyniol ar wefan y Comisiwn Ewropeaidd (yn agor mewn tab newydd).
Mae'r UE yn diweddaru'r rhestr hon o bryd i'w gilydd, felly gwiriwch hi cyn i chi ddechrau.
Gwybodaeth am Symudiad yn y Farchnad Fewnol
Dysgwch sut i ddisgrifio eich nwyddau: Grŵp 6: Adnabod Nwyddau (yn agor mewn tab newydd).
Datganiadau safonol
Dysgwch sut i ddisgrifio eich nwyddau: Disgrifiad o Nwyddau ar gyfer Mewnforion (yn agor mewn tab newydd).
Cynnwys cysylltiedig:
Tariff Ar-lein Gogledd Iwerddon: Chwiliwch am godau nwyddau, cyfraddau tollau a TAW - GOV.UK